خاطرة/ عبد المجيد بن قياس22 جوان2023

,لوح الزاىر بالمظلة تحية للشيخ الضرير الجالس تحت جذع شجرة الخروب,طبعا،لم يرد الشيخ بل غير وضع جلسته بأن اصبح الزاىر وراءه،مستمتعا بالظل والنسيم.اقترب الزاىر حتى صار على مسافة بضع امتار ونادى:

-“اش احوالك يا شيخ؟…جيتك من بعيد،ياخي عطيتني بالظهر”

-بدل الشيخ جلسته مستعينا بعصا من شجرة الخروب متقنة النحت..ثم قال:

“لا وليدي،صابني ضرر في عيوني..مرحبا بك! شكون سيادتك؟”

-انا وليد ولد الشامخ..صاحبك من قديم الزمان

-الشامخ ولد برنية!..راجل وعليه الكلام..رجل من هنا عنده سنين..عاش يتيم الاب،جدك العاتي هزاته فرنسا للاندوشين يحارب بعد عرسه باسبوعين،مات وخلى الشامخ في كرش أمه..كبر الشامخ في الدوار معانا،عانت برنية في تربيته وما قبلت تعرس من جديد..كبر الشامخ،تعلم الفلاحة والتجارة والحدادة وحتى قيس الاراضي..تغيرت الاحوال في الدوار،في الارياف الكل،ولى المهندس يشيرلك اش يلزم تزرع وكيفاش ووقتاش،والمهندس يقسم ويجمع في الاراضي باش الميكانيك ينجم يخدم ويدور براحته،والمهندس يحكم شكون يربي المواشي وشكون لا..ايه،ايه،الحاصل تعبت الأهالي وهجر كل من قدر،بما في ذلك الشامخ،باع اللي يملك وارحل للقرية يخدم عند تورنور طلياني..سمعت اللي عرس في القرية..عرس بوحدة تخدم في معمل القماش!…أنت ولد الشامخ؟…اش اسمك؟

-وليد…الاسم وليد واللقب حداد..

-شبيه بدل اللقب بعد ما رحل؟..اللقب متاعنا راهو”سعدي”..أصلنا نرجعو”اولاد سعيد”..الباي فك اراضينا واعطاها للوزير الاول،وزيد بدللنا اللقب..حتى بوك عمل كيف الباي،هاو بدل اللقب العائلي ههههه..على كل مرحبا بك،الدوار بكله دارك،تجي وقت اللي تحب.

-بارك الله فيك يا شيخ..يا حكيم..في الحقيقة انا سمعت بيك من اللي أنا صغير..بابا دائما يحكي عليك بالباهي..عاد صارت غريبة في حوش الدار اللي نسكنوا فيها،قالي بابا أمشي اسأل على دوار اولاد سعيد واسال على الشيخ..كان مازال حي،الجواب على المشاكل ما يكون كان من عنده..عاد هاني جيت نسال ونثبت حتى تشرفت بلقاىك ومعرفتك

-مرحبا..شنوة المشكل؟ يمس العرض والا مرض والا ميراث ارض؟

-لا هذا ولا ذاك..المشكل غريبة..عندنا شجرة في الحوش تعمل الكيف..كانت امي تستظل تحتها وتغسل ماعون الكوجينة وقصايص القماشات اللي تجيبهم من المعمل..النهارات،كيف ما تشوف،الصيف مصيف،وهي ما عادش عندها ظل!

-بدل الشيخ جلسته مرة أخرى..كيفاه،كيفاه؟ شجرة ما تعملش ظل!

-ايه يا سيدي الشيخ

-زبرتوها اكثر من اللازم؟..طيحت اوراقها؟..طلعتوا حيوط بدوايرها؟

-لا…لا

-ثماش حاجة تبدلت في نهجكم وحومتكم؟

-ثمة تنجم تقول حاجة جديدة تعملت…ماركو مولى معمل القماش بنى بالاص يسكن فيه في البنات اللي يخدموا عنده..قال ماركو”بناء بالاص يتكلف خير من شراء باص”

-هذا باص في عقله! وانتم كيف كيف ههههه..الحقيقة اللي تحب تعرفها هي اللي البالاص هو اللي حجب نور الشمس على الوسطية واصبح الحوش دائما في الظل..كيفاش تحب شجرة تعمل ظل وهي تعيش في الذل…ايه راك تذل الشجرة كيف تحجب عليها الاشعة اللي تتنفس بها وتساعدها في الغذاء..المشكل فيكم موش في الشجرة،انتم كان تحبوا على الظل،هاي باطيمة باولو عملت ظل…كان تحبوا على ظل شجرتكم،قدامكم ثلاثة حويجات:يا تبدلوا بقعة الشجرة،اغرسوها خارج دائرة باطيمة باولو،دبروا روسكم مع الجيران..والا اشكوا بمولى البالاص اللي ضر شجرتكم..وكان برشة جيران كيف حالكم،امشوا طيحوا حيوط البالاص..ياخي،اولاد بن سعيد دائما يتبع فيهم المعمرين،من الباي للوزير الأول الفرنسيس للطلاين!؟…غريبة والله!

-اسكت علينا يا شيخ..ماكرون وميلوني كان يسمعوا يقصوا علينا الصبة

-مقرون! المقرون ليه صيادة…وقلت”مليون”! المليون اللي يعمل الظل ويخلي شجرة الحياة في الذل بلا بيه..اه يا كبدي..قوم،قوم نروحوا للدوار نفطروا وشم ريحة جدودك.